Use mit dr!
Paul Haller · 1882–1920
28 Zeilen in 7 Strophen · zuerst gedruckt 1922
Lauf und hau en Stäcke ab;Hänk de Sack an Rugge.Us dr Stadt de Bärge zue!Das vertrybt dr d’Mugge.
Lueg, wi’s gruenet ufem Land,Gäl, wie schaffe d’Bure?’S git gottlob no ander LütAs i dine Mure.
Freud und Chraft und fäißi Chüeh,Sure Most im Chratte,Mäitli hinderem Gartehag,Wyber uf de Matte.
Obem Dorf de Halde nohBlüehje d’Chuchischälle;Wer di rächten Örtli wäis,Findt e ganzi Wälle.
Spring dur ’s Bürgis Risi uf,Wenn d’witt lehre schwitze!Gang no zerst bim Schmid verby,Er söl dr d’Yse spitze!
Lueg, di schönste Blüemli stöhndA de gechste Wäge.Lauf so lang dr Ote längtUnd di d’Pföste träge!
Z’oberst uf dr WasserfluehStoht es Chrüppeltandli.Z’underst uf der BänkerstroßLauft es Asper Mandli!
Quelle und Rechte
- Textgrundlage
- Gedichte, S. 93, H. R. Sauerländer & Co., Aarau, 1922
- Digitalisat
- de.wikisource.org — „Use mit dr“, Fassung 3.866.849 · Bearbeitungsstand „fertig“ · abgerufen am 2026-08-28
- Gemeinfrei
- Paul Haller starb 1920; das Urheberrecht ist mit Ablauf des Jahres 1990 erloschen (§ 64 UrhG in Verbindung mit § 69 UrhG). Sterbejahr belegt durch den GND-Datensatz 119041952 der Deutschen Nationalbibliothek.
Die Schreibweise ist die der angegebenen Druckausgabe und wurde nicht modernisiert. Was wie ein Tippfehler aussieht, ist in der Regel keiner.