Mordhans
Paul Haller · 1882–1920
33 Zeilen in 11 Strophen · zuerst gedruckt 1922
Es chutet am Bärg und es nachtet im Tal,Käin Vatter dehäim, ’s Veeh brüelet im Stal.O Chind, hol d’Biblen und bätt mr!
O Schmärzen im Lyb und käin Vatter ist do,Gwüß findt er käin Dokter, wo mitem wett cho.O Chind, hol d’Biblen und bätt mr!
Bschlüß d’Tör und mach Liecht und hock zue mr zue,Eusere zweu und de Häiland sind drü und sind gnue.O Chind, hol d’Biblen und bätt mr!
Nächt z’nacht het’s mr traumet. Feister isch gsi,Und niemer dehäim weder du und i,Grad so wie hütt und scho mängist.
Do sägi no zue dr: Chum, hock zue mr zue,Eusere zweu und de Häiland sind drü und sind gnue.O Chind, hol d’Biblen und bätt mr!
Und wo mr no bätte, so stopfet’s veruß.Gottlob, hani g’juchset, de Vatter ist duß!Ietz Chind, hör nume mit bätte!
Do rumplet’s i d’Tör, es chracht und es chlöpftUnd fluechet: Chrüzdonner, iez wärdedr g’chöpft!Chind, Chind, Gott hälfis und bhüetis!
De Mordhans isch es, de Schwarz us dr Au,De Tüfel isch besser. – So stärbed iez, Frau!Käi Bible söl mr’s verwehre.
Do bini verwachet. – Los, stopfet’s nid duß?Iez mahnt’s mi nid anderst, de Mordhans seig duß.Chind, Chind, iez hilft is käis Bätte!
Iez rumplet’s wie nächt, es chlöpft und es chracht,Iez sim-mer am letzte – o bluetigi Nacht!Lieb Vatter, werist dehäime.
Gottlob und Gottdank - o Vatter, bist do?Gogrüeßdi–go–grüeßdi–adie–i–mues–go–O Chind – – –
Quelle und Rechte
- Textgrundlage
- Gedichte, S. 104-105, H. R. Sauerländer & Co., Aarau, 1922
- Digitalisat
- de.wikisource.org — „Mordhans“, Fassung 3.866.835 · Bearbeitungsstand „fertig“ · abgerufen am 2026-08-28
- Gemeinfrei
- Paul Haller starb 1920; das Urheberrecht ist mit Ablauf des Jahres 1990 erloschen (§ 64 UrhG in Verbindung mit § 69 UrhG). Sterbejahr belegt durch den GND-Datensatz 119041952 der Deutschen Nationalbibliothek.
Die Schreibweise ist die der angegebenen Druckausgabe und wurde nicht modernisiert. Was wie ein Tippfehler aussieht, ist in der Regel keiner.